کابل ښاروال مولوي عبدالرشید د ښاریانو ستونزو ته د رسېدنې په موخه د ۵مې، ۶مې، ۱۱مې، ۱۳مې، ۱۵مې، ۱۶مې او ۲۲مې ناحیو له اوسېدونکو سره وکتل. په دې کتنه کې کابل ښاروال دیادو ناحیو د اوسېدونکو له خوا دیو شمېر سړکونو او کوڅو د خرابوالي، د تنظیفي او زرغونتیا برخو د خدمتوتو او ځیني نورو ټولنیزو او ښاري ستونزو له اورېدو وروسته وویل: کابل ښاروالۍ به د بېلابېلو ناحیو د اوسېدونکو د ستونزو د هوارولو په موخه، له شته امکاناتوڅخه په ګټه اخیستنې سره ښاري خدمتونه ته وده ورکړي او د ښاریانو معقولو غوښتنو ته به رسېدنه وکړي. کابل ښاروال زیاته کړه، موږ هڅه کوو چې ښاریانو ته له هوساینې او آرامۍ ډک ژوند برابر کړو،د کابل ښاروالۍ پروژې د ښار په هره ناحیه کې د متوازنې پراختیا له اصولو سره سم ډیزاین او پلي کیږي او په پلي کولو کې یې له دې ادارې سره د ښاریانو مرسته اړینه ده. کابل ښاروال یو ځل بیا ځان د کابل ښاریانو خدمتګار وباله او ويې ويل: د خلکو ملاتړ او هڅونه موږ ته لا زيات قوت راکوي چې د کابل ښار د تل پاتې آبادۍ او ښه پرمختګ لپاره کوټلي او مثبت ګامونه واخلو. په پای کې کابل ښاروال د یادو ناحیو د اوسیدونکو له خوا، د هغه د ارزښتناکو او ګټورو خدمتونو له امله وستایل شو. دغو ښاریانو وویل چې، د کابل ښاروالۍ د مشرتابه له خوا ترسره شوې فعالیتونه د ستاینې او قدر وړ دي