د ګذر وکیلانو د ارزونې کمېټې په ناسته کې چې، د کابل ښاروالۍ د ټولنیزو او کلتوري چارو د مرستیال حاجي محمد نبي عثماني په مشرۍ ترسره شوه، له بېلابېلو ناحیو ور پېژندل شوي کسان و اروزل شول. د کابل ښاروالۍ د ولسي او ټولنیزو چارو د همغږۍ ریاست مرستیال سید عبدالعلي یاسین زي په دې اړه وويل: هغه کسان چې لوړې نمرې یې ترلاسه کړې وې د کمېټې له تائید وروسته به د تصویب لپاره د کابل ښاروالۍ مقام ته وړاندیز شي. نوموړي زیاته کړه: په دې ناسته کې د ورپېژندل شویو کسانو د مرستې کچه، مکلفيتونه، ټولنيز او ښاري مسئوليتونه، اهلیت او شخصيت تر ارزونې لاندې ونیول شول، چې له منظورۍ وروسته به د ولسي او ټولنیزو چارو ریاست له لوري د وکالت مهر تر لاسه کړي او اړوند ناحیو ته به ور وپېژندل شي.