د پنځمې ناحیې اړوند د قرغې فامیلیو په سیمه کې د کانال جوړولو چارې چې، د تېر کال په نیمایي کې پیل شوې وې په دې وروستیو کې بشپړې شوې دي او ډیر ژر به کابل ښاروالۍ ته وسپارل شي. د کابل ښاروالۍ د برنامو او پروژو د تنظیم ریاست د معلوماتو له مخې؛ دغه کانال چې، (۴۹۰) متره اوږدوالی( ۱،۹) متره سور او (۱،۶) متره ژوروالی لري، په اساسي او معیاري ډول جوړ شوی، چې د ذاکرین – قرغې له سړک او د قرغې فامیلیو د کوڅو اوبه د قرغې آبرېزې ته لېږدوي. د یادونې وړ ده چې، د دغه کانال په جوړېدو سره د ورڅېرمه سیمو د سړکونو له ژر ویجاړېدو څخه مخنیوی هم کیږي.