د کابل ښاروالۍ له خوا او د خصوصي سکټور په مرسته، د لومړۍ ناحیې اړوند په سینما بهزاد سیمه کې د وچې میوې د سوداګریز مارکېت د جوړولو چارې روانې دي او ډیر ژر به بشپړې او ګټې اخیستنې ته وسپارل شي. دغه مارکېټ د اقتصادي ودې او د بازار د تنظیم په موخه، په (۵۲۹۰) متر مربع مساحت سره د یوې تهکوۍ په ګډون په دوو پوړونو او پنځو بلاکونو کې جوړېږي. په یاد مارکېټ کې (۱۸۰) هټۍ، د (۱۰۰) موټرو لپاره پارکېنګ، یوه عمومي او دوه فرعي دروازې، د ښاري او لمریزې برښنا او د اور وژنې سیسټم، جومات، تشنابونه او نورې آسانتیاوې هم په پام کې نیول شوې دي. د یادونې وړ ده چې، د بهزاد سینما پخوانۍ ودانۍ د ډیزاین له مخې د وچې میوې لپاره ځانګړې شوې ده چې، ورسره جوخت به د وچې مېوې د پلورونکو بازار په ملي او نړیواله کچه نور هم منظم شي