د خوراکي او غیر خوراکي توکو د کیفیت د کنټرول په لړ کې، د ۱۷مې ناحیې مسئولینو د دې ناحیې له بازارونو څخه (۶۵۰۰) کیلو ګرامه بې کیفیته توکي چې د مصرف نېټه یې هم پای ته رسېدلې وه او دغه راز (۸۰) لوډ سپیکرونه چې د غږې ککړتیا لامل ګرځېدل راټول او د له منځه وړلو په موخه یې ټاکلي ځای ته ولېږدول. د ۱۷مې ناحيې مرستيال مولوي محب الله خاموش په دې هکله وويل: د ښاريانو د روغتيا د خوندي ساتلو په موخه، د دې ناحیې د چاپېريالي روغتيا آمریت له خوا له بازارونو څخه څارنې دوام لري او تمه ده چې ښاريان د خپلو اړتیا وړ توکو د پېرلو پر مهال د هغوی نېټې او کيفيت ته پاملرنه وکړي. همدارنګه ټولو اصنافو او ګرځنده پلورونکو ته هم په کار ده چې په ښار، سړکونو او کوڅو کې د لوډ سپیکرونو په کارولو سره د غږې ککړتیا لامل نه شي. د چاپېریال ساتنې له اړخه د ښاریانو د روغتیا خوندي ساتل، یو له هغو مواردو څخه شمېرل کېږي، چې د کابل ښاروالۍ مسئولین ورته پاملرنه کوي او په دې برخه کې به نه ستړې کېدونکي فعالیتونه دوام لري.