د ښار په کچه د زرغونو سیمو د ساتنې او پراختیا چارې روانې دي

د کابل ښاروالۍ د زرغونتیا ریاست د ونو او نیالګیو د کېنولو او خړوبولو سربېره، د زرغونو سیمو د ساتنې، د سړک په ګلدانونو کې د کټارو نصبولو او د خړوبولو د یوه منظم سیسټم د رامنځته کولو چارې هم تر لاس لاندې لري. د کابل ښاروالۍ د زرغونتیا رئیس مولوي عبدالوکیل متوکل وویل چې، له لب جر څخه تر مارکېټ څلورلارې او د څارندوی بلاکونو په سړک د خړوبولو سیسټم رامنځته شوی چې، له لمریزې برښنا او یوې څاه څخه په ګټې اخیستنې خړوب کېږي. نوموړي زیاته کړه چې، د زرغونو سیمو د ساتنې په موخه د مارکېټ سړک په ګلدان،د سرسبزۍ او تهیه مسکن څلورلارو په ګلدانونو کې د ۲۳۳۵ مترو په اوږدوالي کټارې نصب شوې دي. نوموړې وړاندې وویل چې، د ښار په کچه په نورو برخو کې هم ورته فعالیتونه روان دي او اړتیا ده چې، ښاریان هم د زرغونو سیمو په خړوبولو او ساتنه کې د کابل ښاروالۍ له زرغون اغوستونکو سره همکار و اوسي