د کابل ښاروالۍ د چاپېریالي روغتیا او چاپېریال ساتنې ریاست له لوري په بېلابېلو ناحیو کې د آیسکریمو او د معدني اوبو د تولیدي شرکتونو له استازو سره ناسته ترسره شوه. په دې ناسته کې د غږیزې ککړتیا له امله د رامنځته کېدونکو ستونزو او ورته د حل لارو موندلو په اړه بحث او خبرې وشوې. د کابل ښاروالۍ د چاپېریالي روغتیا او چاپېریال ساتنې ریاست مرستیال مفتي فضل کریم احمد د غږیزې ککړتیا د ناوړه پایلو په اړه معلومات وړاندې کړل او ویې ویل چې، غږیزه ککړتیا د ښاري بې نظمۍ، رواني ناروغیو او نه اورېدو ستونزې رامنځته کېدو سبب ګرځي. نوموړي ټینګار وکړ چې، په دې برخه کې له دوامداره سرغړونو لرونکو سره قانوني چلند کیږي چې، بیا د شکایت حق نه لري. په دې ناسته کې د آیسکریمو او معدني اوبو د شرکتونو استازو ژمنه وکړه چې، د غږیزې ککړتیا د کمولو او مخنیوي په برخه کې به له کابل ښاروالۍ سره اړینه مرسته کوي