د کابل ښاروالۍ له خوا او د چاپېریال ساتنې ملي ادارې، د خصوصي تنظیفي شرکتونو او ښاریانو په مرسته، د دیارلسمې ناحیې په کچه تنظیفي حشر ترسره شو چې، په پایله کې یوه زیاته اندازه کثافات راټول او بند لښتي هم پاک شول. د دیارلسمې ناحیې رئیس مولوي عبدالصمد عابد د حشر له ګډونوالو مننه وکړه او ویې ویل: د ښار پاکول یوازې د کابل ښاروالۍ د تنظیف ریاست مسئولیت نه دی، بلکې په دې برخه کې ټول ښاریان مسئولیت لري. نوموړي زیاته کړه چې، د ښار پاک ساتل د ټولو ملي او دیني دنده ده او باید هېڅکله یې له یاده ونه باسو. دغه راز د چاپېریال ساتنې ملي ادارې د سیمه ییزې څارنې آمر مولوي عبدالامیر مبارز وویل: د کابل ښاروالۍ تنظیفي کارکوونکي د ښار د پاکولو په برخه کې ډېر زیار ګالي خو د ښاریانو له مرستې پرته به ناشوني وي چې، خپل پلانونه په ښه توګه پلي کړي. د نوموړي په وینا؛ ښاریان باید د ښار په پاکولو کې برخه واخلي او د زیارکښه نارنجي اغوستونکو ملتیا دې وکړي