په ناقانونه توګه د څارویو له ذبح کولو او د غیر سالمې غوښې له کارولو څخه د مخنیوي په موخه، د کابل ښاروالۍ، کرنې اوبو لګولو او مالدارۍ، عامې روغتیا، کورنیو چارو وزارتونو، د مسلخ امارتي شرکت، د چاپېریال ساتنې ملي ادارې او د کابل امنیه قوماندانۍ له استازو څخه جوړ شوي ګډ کمیسیون په کابل ښار کې د ودونو له هوټلونو څخه څارنه وکړه او سرغړونکو ته یې اړینې سپارښتنې وکړې. د کابل ښاروالۍ د چاپېریالي روغتیا او چاپېریال ساتنې ریاست مرستیال مفتي فضل کریم احمد په دې اړه وویل: د ودونو د هوټلونو فعالیت کوونکي مکلف دي چې، خپله د اړتیا وړ غوښه له قانوني او معیاري مسلخونو څخه ترلاسه کړي او د خپلو هوټلونو په انګړ کې د څارویو له ذبح کولو څخه په کلکه ډډه وکړي؛ ځکه د دوی دا کار د وخت په تېرېدو د بېلابېلو ناروغیو د خپرېدو او د چاپېریال د ککړتیا لامل ګرځي. نوموړي زیاته کړه چې، د ودونو په هوټلونو کې له غوښې څخه د ګټې اخیستنې له څرنګوالي څخه د یاد کمیسیون له لوري په دوامداره توګه څارنه کېږي. د چاپېریالي روغتیا او چاپېریال ساتنې مرستیال همدا راز وویل: ښاریانو ته د آسانتیاوو رامنځته کولو، د ناروغیو له خپرېدو او د چاپېریال له ککړتیا څخه د مخنیوي په موخه، د قصابیو مخې ته، په عمومي ځایونو او د هوټلونو په انګړ کې د څارویو ذبح کول په کلکه منع دي، ښاریان باید په کاریزمیر، ریشخور، د مکروریانو څلورلارې او کمپنۍ سیمو کې له شته قانوني او معیاري مسلخونو څخه د څارویو د ذبح کولو په برخه کې ګټه پورته کړي