د خیرخانې کوتل سړک د دویمې برخې د دویمې لیکې قیر چارې تېره ورځ ناوخته د کابل ښاروال مولوي عبدالرشید تر څارنې لاندې پیل شوې. له کابل ښاروال سره په دې لیدنه کې د وادانیزو چارو مرستیال انجنیر عامر زمرک یاسر هم مل وو. کابل ښاروال څرګنده کړه چې، د یاد سړک قیر چارې په لابراتوار کې د موادو تر ازمویښت وروسته ترسره کېږي، ځکه د سړک جوړونې په پروژو کې د کیفیت شتون د کابل ښاروالۍ د مشرتابه لپاره لومړیتوب دی. کابل ښاروال زیاته کړه چې، په هېڅ وجه باید کیفیت د سرعت قرباني نشي او د یادې پروژې چارې دې د تخنیکي اسنادو او ډیزاین له مخې په ټاکلي وخت ترسره شي. د خیرخانې کوتل دویمه برخه د کوتل له سر څخه تر بوستان سړک پورې ۲۵۲۰ متره اوږدوالی او ۶۰ متره سور لري چې، د یوه معیاري سړک ټول جزئیات په بر کې نیسي. ورته مهال د یاد سړک د پاتې خاورینې برخې په جوړولو هم کار روان دی ترڅو قیر چارو ته چمتو شي. هڅه کېږي چې، د سړک جوړونې د دې مهمې پروژې چارې د روان کال په بهیر کې بشپړې او ګټې اخیستنې ته وسپارل شي.