کابل ښاروال مولوي عبدالرشید د څلورمې، پنځمې، اتمې او پنځلسمې ناحیو له اوسېدونکو سره په کتنه کې د دوی چاپېریالي او ښاري ستونزې واورېدې او ډاډ یې ورکړ چې، د ښاریانو معقولو غوښتنو ته به د امکان تر حده رسېدنه وشي. کابل ښاروال وویل: زموږ موخه ښاریانو ته د پاک، هوسا او د ژوند لپاره د مناسب چاپېریال رامنځته کول دي، د کابل ښاروالۍ پراختیایي پروژې د ښار په ټولو برخو کې د متوازنې پراختیا د اصل پر بنسټ ډیزاین او پلي کیږي، خو د یادو پروژو د پلي کولو په برخه کې د ښاریانو رول ډېر مهم او اغیزناک دی. د دې کتنې په پای کې کابل ښاروال د ښاري مدیریت او د ښاري پلانونو د پلي کېدو په برخه کې د غوره کړنو له امله د یادو ناحیو د استازو له خوا وستایل شو. کابل ښاروال ځان یو ځل بیا د کابل ښاریانو خادم یاد کړ او زیاته یې کړه: د ښاریانو هڅونه موږ ته د ښار د آبادۍ او پراختیا په برخه کې د لا ډېر خدمت کولو انګیزه راکوي