کابل ښاروال مولوي عبدالرشید د ښار په کچه د بېلابېلو ناحیو د تنظیفي خدمتونو د خصوصي شرکتونو له رئیسانو او استازو سره ولیدل او د کثافاتو د مدیریت په برخه کې یې د هوکړه لیک د مادو په ښه پلي کېدو ټینګار وکړ. کابل ښاروال وویل: د ترلاسه شویو معلوماتو او عیني مشاهداتو پر بنسټ د تنظیفي خدمتونو یو شمېر شرکتونه د هوکړه لیک خلاف کثافات راټولوي او د ښار په نورو برخو کې یې کثافات دانیو ته لېږدوي چې، دا کار د کثافاتو د تیت کېدو او د کابل ښاروالۍ تنظیفي کارکوونکو ته د ګڼو ستونزو د رامنځته کېدو لامل ګرځي. نوموړي څرګنده کړه چې، د تنظیفي خدمتونو شرکتونه مکلف دي څو د داسې سرغړونو له تکرار څخه ډډه وکړي؛ له دې پرته به یې فعالیتونه وځنډول شي. د تنظیفي خدمتونو له خصوصي شرکتونو سره د شوي هوکړې له مخې د کورونو له مخې څخه راټول شوي کثافات باید له ښار څخه د باندې د ګزک سیمې ته ولېږدول شي او دا موضوع باید خپلو ټولو کارکوونکو ته روښانه کړي. د ناستې په پای کې کابل ښاروال د تنظیفي خدمتونو د خصوصي شرکتونو ستونزې واورېدې او اړوند مسئولینو ته یې سپارښتنه وکړه څو یې د حل په برخه کې اړین ګامونه پورته کړي