د کابل ښاروالۍ د ټولنیزو او کلتوري چارو د مرستیال حاجي محمد نبي عثماني په مشرۍ یوه پلاوي د کابل ښاروالۍ او کابل ښاریانو مرستې نیمروز ولایت ته ولېږدولې. دا مرستې د نیمروز ولایت مقام د دفتر رئیس مولوي ابراهیم شاهین، د زرنج ښاروال مولوي صلاح الدین ممتاز او د یاد ولایت د عالمانو شورا د استازو په شتون کې بېرته راستنو شویو هېوادوالو ته د مرستو راټولو ځانګړې کمېټې ته د ابریشم پُل په میشت غالي کې وسپارل شوې. د کابل ښاروالۍ د ولسي او ټولنیزو چارو د همغږۍ رئیس قاري انعام الله قاضي زاده په دې اړه وویل: له بېرته را ستنو شویو او اړمنو سره د کابل ښاروالۍ او کابل ښاریانو مرستې چې، ۴ میلیونه ۳۶۲ زره افغانۍ، ٢٢٠٠ ډالر نغدې پیسې، او یوه لارۍ البسه او د کور اړین توکي پکې شامل دي اړوند کمېټې ته د ویش په موخه وسپارل شوې. نوموړي زیاته کړه چې، کابل ښاروالۍ او د کابل شریف خلک چمتو دي چې، د ورورولۍ روحیې له مخې د خپلو هېوادوالو ترڅنګ ودرېږي، ځکه په سختو شرایطو کې یو د بل لاسنیوی د ټولو هېوادوالو په ځانګړې توګه د کابل ښاریانو یو بډایه دود او فرهنګ دی. ورته مهال د کابل ښار د دوه ویشت ګونو ناحیو د ګذر وکیلانو شورا رئیس حاجي احمدشاه الکوزي وویل: له بېرته را ستنو شویو هېوادوالو سره مرسته کول زموږ ټولو دیني، ملي او اخلاقي دنده ده. د نوموړي په وینا؛ کابل ښاریان له نورو ادارو سره په همکارۍ په هر ډول شرایطو کې چمتو دي چې، له خپلو اړمنو هېوادوالو سره مرسته وکړي