د ښاریانو د روغتیا خوندي ساتلو په موخه، د کابل ښاروالۍ د چاپېریالي روغتیا او چاپېریال ساتنې ریاست له خوا د ښار له بازارونو څخه را ټول شوي (۲۶۸۳۳) کیلو ګرامه بې کیفیته خوراکي او غیر خوراکي توکی چې، د مصرف نېټه یې هم پای ته رسېدلې وه د ټاکل شوي پلاوي په حضور کې له ښار څخه د باندې په ګزک سیمه کې له منځه یوړل شول. د کابل ښاروالۍ د چاپېریالي روغتیا او چاپېریال ساتنې ریاست مرستیال مفتي فضل الکریم احمد په دې اړه وویل: په دغو توکو کې شیدې، ملایي، غوړي، پنیر، د لوبیا، نخودو او ماهي کنسرو، د رومي بادنجانو روب، چپس، پاپړ، شامپو، صابون او څښاک توکي شامل دي. نوموړي زیاته کړه چې، په له منځه وړل شویو توکو کې یو شمېر هغه لوډسپیکر چې، د غږیزې ککړتیا لامل ګرځېدلي وو هم موجود وو. د کابل ښاروالۍ مسئولین د ښاریانو د روغتیا خوندي ساتلو په موخه، په دوامداره توګه له بازارونو څارنې کوي. دغه راز له ټولو اصنافو څخه غوښتنه کیږي چې، د بې کیفیته توکو له پلورلو څخه په کلکه ډډه وکړي او ښاریان دې هم د اړتیا وړ توکو نېټې او کیفیت ته په جدي توګه پام وکړي