د نهمې ناحیې د مسئولینو له خوا د څلورم مکروریان په سیمه، د هوايي ډګر او د مطبعې سړک په اوږدو کې د بازارونو نظم وڅارل شو او سرغړونکو ته له تادیب سربېره، اړینې سپارښتنې وشوې. د نهمې ناحیې مرستیال مولوي عبدالغفور غفوري وویل چې، دا کار د ښاري نظم د رامنځته کېدو، د ښاریانو د حقونو د خوندیتوب او په بازارونو کې د خدمتونو د کیفیت لوړولو په موخه ترسره شو. نوموړي زیاته کړه چې، په لویو پلورنځیو کې د نرخنامې د تطبیق له څرنګوالي، د خوراکي او غیر خوراکي توکو له نېټې او کیفیت، د صنفي جواز له شتون او په نانوایانو، قصابیو او رستوانتونو کې د حفظ الصحې له څرنګوالي هم څارنه وشوه. اصنافو او فعالیت کوونکو ته په ټینګار سره وویل شول چې، په پلیو لارو کې خنډونه رامنځته نه کړي، د ښار پاکوالي ته پام وکړي او د حفظ الصحې اصول او سپارښتنې په جدي توګه مراعات کړي