له دوه کالو هڅو او سلا مشورو څخه وروسته، کابل ښاروالۍ په دي وتوانیده چې د لوګر تانګ سړک په اوږدو کې د استملاکي جایدادونو او خنډونو لري کولو پخاطر د جایدادونو له خاوندانو سره هوکړي ته ورسیږي، چې په پایله کې یې یاد ښاریان چمتو شول ترڅو کابل ښاروالۍ سره په دي برخه کې مرسته وکړي، او تیره ورځ د ۱۳۹۸کال د وري میاشتي په ۵مه نیټه د کابل ښاروال پوهنیار احمد ذکي سرفراز، د جایدادونو خاوندانو، او د اتمي ناحیې مشرانو په حضور کې د خلګو په تود هرکلي د خنډونو لري کولو چاري پيل شوي او کابل ښاروالی ددی خلکو د همکاری څخه منندوی دی. په پام کې ده چې د خنډونو لري کولو کار پرمختګ سره سم، د دي پرمختیایي سړک د عملي رغولو چاري به د مربوطه ادارې له خوا پيل شي. یاد سړک د کابل ښارله مهمو اقتصادي سړکونو څخه ګڼل کیږي، او له بلي خوا د پرمختیایي سړکونو رغول د ښار ماسترپلان سره سم، د ترافیکي ګڼي ګوڼي مخنیوي کوي او د ښار پراختیا د پرمختللو معیارونو په پام کې نیولو سره د کابل ښار له لومړیتوبونو څخه ګڼل کیږي.
