د ګذر وکیلانو په توګه د وړ کسانو د ټاکلو په موخه د کابل ښاروالۍ د ټولنیزو او کلتوري چارو د مرستیال حاجي محمد نبي عثماني په مشرۍ د ګذر وکیلانو د ارزونې کمېټې غونډه ترسره شوه. په دې غونډه کې د څلورمې، شپاړلسمې، اولسمې او اتلسمې ناحیې د ګذر وکیلانو لړلیک تر غور او ارزونې لاندې ونیول شو او هغه کسان چې، لوړ امتیاز ترلاسه کړي د کابل ښاروالۍ مقام ته به د تصویب لپاره وړاندیز شي. تر رسمي تائید وروسته به د کابل ښاروالۍ د ولسي او ټولنیزو چارو د همغږۍ ریاست له لوري ورته د وکالت مهر وسپارل شي او اړوند ناحیې ته به معرفي شي څو د کړنلارې له مخې خپل فعالیت پیل کړي. ګذر وکیلان د ښاریانو او مسئولانو ترمنځ د نښلوونکي پُل په توګه د ټولنیزو او ښاري ستونزو د حل په برخه کې مهم رول لري. د ځانګړې کړنلارې له مخې د نویو ګذر وکیلانو ټاکل د خلکو د مشارکت او ښاري مدیریت په برخه کې د کابل ښاروالۍ له اصلاحي برنامو څخه شمېرل کېږي