کابل ښاروال پوهنیار احمد ذکي سرفراز د روان کال وری میاشتي په یوولسمه نیټه د یکشنبې په ورځ یوویشتمه ناحیه کې د نیالګیو کینولو کمپاین کې ګډون وکړ، او د لري پرتو ناحیو په وده چې تر اوسه پکې ښاري آسانتیاوي ندي رامنځته شوي ټینګار وکړ. کابل ښاروال د یادي ناحیې اوسیدونکو ته څرګنده کړه چې اړینه ده د خلګو په مشوره د دي ناحیې پلان چمتو شي او د ناحیې ودي پخاطر ډیر ژر پلي شي ترڅو د غیر پلاني سیمو او ښاري آسانتیاو رامنځته کولو په تړاو د خلګ ستونزې حل شي. یوویشتمه ناحیه یوه له هغو ناحیو څخه ده چې د ودي پخاطر یې تر اوسه پاملرنه ندي شوي، چې له نیکمرغه کابل ښاروالۍ په پام کې لري د هم مهالي ودي اصل ته په کتو لري پرتو ناحیو ته هم پاملرنه وکړي. کابل ښاروال وویل: خلګو ته پکار ده چې له شته امکاناتو په ځانګړي توګه اوبو څخه د ناحیې سمسورتیا پخاطر سمه ګټه واخلي ځکه هغه څه چې هیڅ توان نلري او تل تري ګټه پورته کیږي د نیالګیو ایښودل او ترې ساتنه ده. د یو بل خبر له مخې په یوویشتمه ناحیه کې د غازی آباد سړک چې ۱.۷۵کیلومتره اوږدوالي او ۸ متره پلان والي لري او تیرکال یې د کابل ښاروالۍ له لوري د جوړیدو چاري پیل شوي وي، بشپړ او د کابل ښاروال له لوري د پټي په پریکولو سره ګټي اخیستني ته وسپارل شو، چې په یاده ناحیه کې دا لومړي رغول شوي سړک دی.
