د دولسمې ناحیې اړوند د احمدشاه بابا مېنې په دویمه څلورلارې کې د ( عمري بازار) په نامه د یوه سوداګریز مارکېټ د جوړولو چارې بشپړې او د کابل ښاروالۍ د مسئولینو او هټیوالو له خوا ګټې اخیستنې ته وسپارل شو. دغه مارکېټ چې، د اقتصادي ودې، سوداګریزو فرصتونو رامنځته کولو او د بازار د تنظیم په موخه، په ۲۴۰۰ متر مربع ځمکه او یوه پوړ کې ډیزاین شوی دی، په ټوله کې ۲۸۰ هټۍ لري. د دې مارکېټ د جوړولو چارې د کابل ښاروالۍ له خوا او د خصوصي سکټور په مرسته، د ۲۰ میلیونه افغانیو په لګښت د ۳ میاشتو په موده کې بشپړې شوې. د یاد مارکېټ په جوړېدو سره به د سیمې هټیوالو او نورو کسبګرو ته د منظم فعالیت زمینه برابره شي.