د ۱۳۹۸ کال د چنګاښ په ۵مه د کابل ښاروالۍ د سرسبزۍ ریاست د کاردان پوهنتون په همکارۍ د ښار د شنو سیمو د ساتنې په اړه د عامه پوهاوي کمپاین وکړ. دې کمپاین کې د تایمني پخوانۍ څلور لارې ساحه کې د ګلانو او ونو د ساتنې، د ټرافیکي اشارو د مراعت، شنو سیمو د خوندیتوب، د پلاستیکي خلطو د کارونې د ضررونو او نورو مسایلو په اړه خلکو ته پوهاوی ورکړل شو. د کمپاین لومړۍ برخه کې د ګلانو او نیالګیو له کېنولو او ورسره پر خلکو د چاپیریال ساتنې او ښاري فرهنګ د ودې د شعارونو وېشنه شامله وه. دویمه برخه کې یې پر ډریورانو یو یو ګل وویشل شو او ورته وویل شول چې ټرافیکي اشارې مراعات کړئ. د پلاستیکي خلطو د مخنیوي د شعارونو وېش د کمپاین دریمه برخه وه چې په کې له ټولو ښاریانو وغوښتل شول د پلاستیکي خلطو کارونه بس کړي. دغه کمپاین چې د خلکو له تود هرکلي سره مخ شو، خلکو وویل د عامه پوهاوي د کچې لوړولو لپاره دا ډول کمپاینونه خورا ګټور دي. د کمپاین په اخره کې ټولو په یو غږ دا شعار ورکړ چې دولت خپل کار وکړ اوس زموږ د مسوولیت د اداینې وار دی. کمپاین کې له ښاریانو وغوښتل شول چې خپل مسوولیتونه درک کړي او د ټولو ښاري ادابو او اصولو مراعات دې له ځانه شروع کړي.
