د ښاري اصولو او قوانینو د پلي کېدا لپاره د کابل ښاروالۍ د ښاري پولیسو قطعې له تیرو دریو ورځو راهیسې د ساختماني سرغړونو او غصب د مخنیوي کمپاین پیل کړی دی چې ټولو ناحیو ته به یې لمن وغځېږي او متخلفینو سره به جدي قانوني چلند وشي.
دغې پولیسې قطعې تر اوسه د زیاتو ناقانونه ودانیز کارونه درولي او د کابل ښاروالۍ غصب شوې ځمکه یې له غاصبینو بیرته راګرځولې.
د دې قطعې قومندان سمونیار مجیب احمدي وایي، هغه ودانۍ چې کارونه یې درول شوي، د خپلو قانوني مسایلو له حلولو وروسته کولی شي مالکان یې بیرته کارونو ته دوام ورکړي.
نوموړي زیاته کړه پر دغو ودانیزو چارو به یې د ګرځنده ډلو څار روان وي او سرغړوونکي به سمدواره عدلي ـ قضایي ارګانونو ته ور وپیژني.
د یادونې ده چې د دغو ناقانونه ودانیو له کبله د کابل ښار معیارونه تر پښو لاندې شوي وو او د ښاري بې نظمۍ تر څنګ یې چاپیریال ته هم ګواښ متوجه کړی و چې له کبله یې د معیاري او پایداره ښاري سيسټم لرلو لپاره یو ماستر پلان او د هغې کلک تطبیق ته اړتیا لیدل کیده.
له دې وروسته هغه کسان چې د ودانیو په لوړولو لاس پورې کوي باید د ښاروالۍ جواز او ویزه شوې نقشه له ځانه سره ولري.