د کابل په منډوي کې یو سوداګریز مارکېټ ګټې اخیستنې ته وسپارل شو

د کابل ښاروالۍ له خوا او د خصوصي سکټور ( قراردادي شرکت) په مرسته، د کابل د منډوي اړوند د بېلر په کوڅه کې د کور د وسایلو یوه سوداګریز مارکېټ د جوړولو چارې بشپړې او ګټې اخیستنې ته وسپارل شو.
دغه مارکېټ چې، په ۳۵۱ متر مربع ځمکه کې په اساسي توګه په دوو پوړونو کې د ۵۲ هټیو په درلودلو سره جوړ شوی، متشبیثینو ته یې کاري چاپېریال رامنځته کړی دی.
کابل ښاروالۍ د زېربنايي او د سړک جوړونې پروژو ترڅنګ، د کاري فرصتونو د رامنځته کولو او اقتصادي ودې په موخه، د سوداګریزو مارکېټونو د جوړولو زمینه هم برابروي. چې، یاد مارکېټ د دغو هڅو یوه غوره بېلګه ده.
د قرارداد له مخې به قراردادي شرکت د مارکېټ جوړولو په بدل کې د ۳ کلونو لپاره له متشبیثینو څخه د هټیو کرایه راټولي او په میاشتني ډول به ۵۳۵۰۰۰ افغانۍ د دولتي کرایې په توګه کابل ښاروالۍ ته ورکوي. له دې ملکیت څخه به د کابل ښاروالۍ عواید د پخوا په پرتله د پام وړ زیات او له دریو کلونو وروسته به د قرارداد په اړه له سره کتنه وشي.