د شپاړلسمې ناحیې مسئولینو د خوراکي اوغیرخوراکي توکو د کیفیت د کنټرول په ترڅ کې، ۴۶۹۰ کیلوګرامه بې کیفیته توکي چې، د مصرف نېټه یې هم پای ته رسېدلې وه او دغه راز ۲۵ لاوډسپیکرونه چې غږیزه ککړتیا یې رامنځته کوله د دې ناحیې له بازارونو څخه راټول او د له منځه وړلو په موخه یې ټاکلي ځای ته ولېږدول.
د ښاریانو د روغتیا د خوندي ساتلو په موخه، د دې ناحیې د چاپېریالي روغتیا څانګې د کارکوونکو له خوا څارنې دوام لري. همدارنګه ښاریانو ته په کار ده چې، د اړتیا وړ توکو د پېرلو پر مهال د هغو د مصرف نېټې او کیفیت ته پام وکړي.
د ښار ټولو هټۍ والو او ګرځنده پلورونکو ته سپارښتنه کېږي چې، په سړکونو او کوڅو کې د لاوډسپیکرونو په کارولو سره د غږیزې ککړتیا د رامنځته کولو لامل نه شي.
د شپاړلسمې ناحیې اړوند بازارونو څخه ۴۶۹۰ کیلو ګرامه بې کیفیته توکي راټول شول