په کابل ښاروالۍ کې ودانیزو سرغړونو ته د رسېدنې کمېټې غونډه ترسره شوه

د غیرمعیاري ودانیو د جوړېدو د مخنیوي او د ښاري اصولو د پلي کېدو په موخه، ودانیزو سرغړونو ته د رسېدنې کمېټې غونډه د کابل ښاروال مولوي عبدالرشید په مشرۍ ترسره شوه.
په دې غونډه کې کابل ښاروال د ښاري معیارونو خلاف ودانیو پر وړاندې پر جدي چلند ټینګار وکړ او ویې ویل: اړوند مسئولین باید د مسئولیت احساس، کاري وجدان او د هېواد پالنې روحیې له مخې د قانون د پلي کولو په برخه کې لا زیاتې هڅې وکړي.
نوموړي همداراز د تائید شویو نقشو مطابق د ودانیو پر جوړولو ټینګار وکړ او زیاته یې کړه چې، کابل ښاروالۍ له هر ډول قانوني او معیاري ودانیو څخه چې د رسمي جواز له مخې جوړېږي، ملاتړ کوي.
کابل ښاروال زیاته کړه، د پانګونې د هڅونې، منظمې ښاري پراختیا او د کاري فرصتونو د رامنځته کولو په موخه، د ټاکل شویو شرایطو مطابق د ودانیز جوازونو د وېش په بهیر کې اړینې آسانتیاوې رامنځته شوې دي.
د غونډې په پای کې، یو شمېر ودانیزې سرغړونې وڅېړل شوې او د هرې یوې په اړه اړینې پرېکړې وشوې.