د شش درک سیمې د فرعي سړکونو قیرچارې د کابل ښاروال تر څارنې لاندې روانې دي

د نهمې ناحیې اړوند د شش درک سیمې د فرعي سړکونو قیر چارې، د کابل ښاروال مولوي عبدالرشید تر څارنې لاندې، په چټکۍ او د تخنیکي معیارونو مطابق روانې دي. کابل ښاروال د دې پروژې د څارنې پر مهال اړوندو مسئولینو ته سپارښتنه وکړه چې، د قیر اچولو چارې دې د کیفیت په پام کې نیولواو د تخنیکي معیارونو مطابق ژر تر ژره بشپړې کړي، څو ښاریانو ته لازمې آسانتیاوې رامنځته شي.
دغه پروژه چې، په تولیزه توګه ۱۵۰۷ متره اوږدوالی، ۱۲ او ۱۵ متره سور لري، د پلیولارو، جدولونو او نورو جزئیاتو په ګډون ډیزاین شوې ده او تر راتلونکې یوې میاشتې پورې بشپړه شي.
د یادې سیمې اوسېدونکي تر دې وړاندې د سړکونو د خرابوالي له امله له ګڼو ستونزه سره مخ وو چې، د دې پروژې په پلي کېدو سره به یې ستونزې هوارې اوګڼو آسانتیاوو ته به لاس رسی ومومي.
کابل ښاروالۍ ژمنتیا لري چې، د ښار په بېلابېلو سیمو کې د زېربنايي پروژو په پلي کولو سره ښاریانو ته د ژوند اړینې آسانتیاوې برابرې کړي.