د کابل ښاروالۍ په تخنیکي او ساختماني معینیت کې د سالم کاري چاپېریال د خوندیتوب او د اخلاقي قواعدو په پام کې نیولو په موخه د ښځو د ازار او ځورونې د منع ورکشاپ جوړ شو.
په دغه ورکشاپ کې د کابل ښاروالۍ د تخنیکي او ساختماني چارو مرستیال محمد صدیق صاحبزي د کابل ښاروالۍ په مختلفو برخو کې د نارینه او ښځینه قشر همکارانو تر منځ د اخلاقي او کاري خوندیتوب د رامنځته کولو په باب په خبرو کې وویل: د کابل ښاروالۍ مشرتابه د ښځو لپاره د خوندي کاري فضا په رامنځته کولو کې بشپړ جدیت او قاطعیت لري، چې د دا ډول ورکشاپونو جوړول د سالم اداري فرهنګ په رامنځته کولو کې مرسته کوي او موږ خپلو موخو ته چې د ښار ابادي او د ښځو د افکارو او استعدادونو غوړېدنه ده، رسوي.
همداراز د کابل ښاروالۍ مقام د ښځو چارو سلاکار یادونه وکړه چې په دا ډول ورکشاپونو کې د دې ادارې د مسولانو او کارکوونکو ګډون اړین دی، چې تر دې وروسته به له بد اخلاقه او بد چلنده کسانو سره د دولت د اداري اصولو او قواعدو پر اساس قانوني چلند کېږي.
په همدغه ترتیب د کابل ښاروالۍ د جندر آمر په کابل ښاروالۍ کې د وړ کاري فضا په برخه کې د ښځو د ازار او ځورونې د پوهاوي ورکشاپونو په اړه د اداري نظم، فردي او ټولنیزو اخلاقیاتو د ټينګښت لپاره د دې ادارې پروګرامونه او هغه معلوماتي کڅوړې چې د ښځو د ازار او ځورونې د منع قانون بندونه پکې روښانه شوي وو، د ورکشاپ حاضرینو ته وړاندې کړې.