د دولسمې ناحیې د نوې اداري ودانۍ د جوړولو چارې وروستي پړاو ته رسېدلې دي

د ماموریت څلورلارې او د احمدشاه بابا مېنې د څلورم بلاک ترمنځ سیمه کې د دولسمې ناحیې د نوي اداري ودانۍ د جوړولو چارې وروستیو پړاوونو ته رسېدلې دي او ټاکل شوې چې دغه ودانۍ ډېر ژر ګټې اخیستنې ته وسپارل شي.
په یاده ودانۍ کې چې، د۵۵۰ متر مربع په مساحت سره، د یوې تهکوۍ په ګډون په درېیو پوړونو کې طرحه او جوړه شوې ده، جومات شریف، اداري دفترونه، د غونډو خونه، دهلیزونه او تشنابونه هم په پام کې نیول شوي، څو د کارکوونکو لپاره مناسب کاري چاپېریال او مراجعینو ته لا ډېرې آسانتیاوې رامنځته شي.
دغه راز د دې ودانۍ په شاوخوا کې پلي لارې او زرغونې سیمې هم په پام کې نیول شوې دي چې، د مناسب چاپېریال په رامنځته کولو سره به ښاري خدمتونو ته د ښاریانولاسرسي آسانه شي.
د دې پروژې په بشپړېدو سره به دولسمه ناحیه یوه ځانګې او دایمي اداريودانۍ ولري، چې د اداري نظم په ښه والي، د خدمتونو د وړاندې کولو د بهیر په چټکتیا او د ښاریانو لپاره د لا ډېرو آسانتیاوو په برابرولو کې اغېزمن رول ولوبوي.