کابل ښاروال او ورسره مل پلاوي په کندهار کې له یو شمېر زېربنايي پروژو څخه لیدنه وکړه

کابل ښاروال مولوي عبدالرشید، د کندهار ښاروال مولوي عبدالله روحاني او وسره مل پلاوي په کندهار ښار کې د سړک جوړونې له درېیو پروژو څخه لیدنه وکړه. دغه پروژې د کابل ښاروالۍ د ښاري زیربناوو ریاست له خوا په معیاري توګه طرحه او ډیزاین شوې دي.
د لیدنې پر مهال د سړکونو د طرحې او پلان جوړونې، د سړکونو د ترافیکي تحلیل، د سړکونو د توپوګرافي او املاکي سروې او د پروژو د ډیزاین او تخنیکي ځانګړنو په اړه بحث او هر اړخیزه ارزونه ترسره شوه.
کابل ښاروال مولوي عبدالرشید د دغو پروژو له پرمختګ څخه خوښي څرګنده کړه او ویې ویل: د کابل ښاروالۍ تخنیکي او مسلکي ټیمونه چمتو دي، څو د ښاري پلانونو د چمتو کولو، د زېربنايي پروژو د طرحې او ډیزاین په برخو کې له کندهار ښاروالۍ سره همکاري وکړي.
نوموړي همدا راز د کابل ښاروالۍ او د هېواد د نورو ښاروالیو ترمنځ د همکاریو او د مسلکي تجربو د شریکولو په پراختیا ټینګار وکړ او زیاته یې کړه چې، د افغانستان د ښارونو ترمنځ د مسلکي تجربو تبادله او د بریالیو ښاري طرحو پلي کول کولای شي د ښارونو د ودې او پراختیا په برخه کې اغېزمن تمام شي.
ورته مهال د کندهار ښاروال مولوي عبدالله روحاني د کندهار ښار د سړک جوړونې پروژو د پلان او ډیزاین په برخه کې د کابل ښاروالۍ له همکارۍ څخه مننه وکړه او ویې ویل: هغه زېربنايي او ټولګټې پروژې چې، اوس مهال په کابل ښار کې پلې کېږي، کولای شي د هېواد د مخ پر ودې ښارونو لپاره د نمونې په توګه وکارول شي.
د ا.ا.ا د مشرتابه د حکم پر بنسټ د کندهار ښار د سړک جوړونې درې پروژې د کابل ښاروالۍ د ښاري زیربناوو ریاست له خوا په عصري او معیاري ډول طرحه او ډیزاین شوې دي.
په دغو پروژو کې لومړۍ پروژه له کپتان مدد څلورلارې څخه د فرقې په لوري او د تپې شمال لوري ته تر ډنډ څلورلارې پورې سړک دی چې، ۶۰ متره سور او ۳۱۰۰ متره اوږدوالی لري. دویمه پروژه له میرویس شاندیز رستورانت څخه د کندهار–بولدک او کندهار–کابل تر لویو لارو پورې د د کندهار ښار دننه د حلقوي سړک جوړول دي چې ۸۹۵۰ متره اوږدوالی او ۴۰ متره سور لري. درېیمه پروژه له ډنډ څلورلارې څخه تر باغ پُل پورې د سړک جوړول دي، چې ۶۰ متره سور او ۹۸۰۰ متره اوږدوالی لري.