کابل ښاروال پوهنیار احمد ذکي سرفراز د تېرې پنجشنبې په ورځ د اداري اصلاحاتو او ملکي خدمتونو له رییس احمد نادر نادري سره د کابل ښاروالۍ د سازماني جوړښت پر اصلاح ټینګار وکړ. په دې ناسته کې دواړو اړخونو د اصلاحاتو لکه د کاري کیفیت لوړوالي، تخصصي کېدو، نااړینې بیروکراسۍ پر کمښت او د بشري سرچینو د ظرفیت پرلوړوالي بحث وکړ، چې د کابل ښاروالۍ سازماني جوړښت باید د دغه بنسټ د اساسي دندو او د کابل ښار د ښاري پراختیا د لیدلوري په ځانګړې توګه ښاریانو ته د معیاري خدمتونو د وړاندې کولو پر بنسټ وي. د یادونې وړ ده چې کمیسیون او کابل ښاروالۍ تر یوې کچې د دغه بنسټ پر تشکیل کار کړی، خو له اصلي دندو او د کابل ښار له ښاري پراختیا سره د کابل ښاروالۍ د سمون پر طرحه کار روان دی، چې ژر به نهايي شي او ټاکل شوې ده چې په لومړي قدم کې د کابل ښاروالۍ ۳ او ۴ام بستونه اصلاح شي.
