تېره ورځ په هغه غونډه کې چې د تولیدي کثافاتو په ځانګړې توګه د پخلنځي (وچو او لامدو) کثافو په مدیریت او بېلولو کې د ښځول رول د پياوړتیا په موخه جوړه شوې وه، د کابل ښاروالۍ د ټولنیزو او کلتوري چارو معین مرستیال سرڅېړونکي محمد فاضل شریفي، د ښاري او چاپېریال ساتنې مرستیاله ډاکټره مهتاب عالمي، له کابل ښاروالۍ څخه د (اروپايي ټولنې) د ملاتړ پروژې همکارانو او د لومړۍ، شپږمې، اومې او شلمې ناحیې د ښځو شورا غړو ګډون پکې کړی، په کورنیو کې یې د کثافاتو د تولید پر کمښت بحث وکړ. په دې غونډه کې د کابل ښاروالۍ د ښاري چارو مرستیالې په خپلو ویناوو کې په ټولنه کې د ښځو د رول پر پياوړتیا خبرې وکړې او ویې ویل: څنګه چې ښځې په خپل مثبت او ښکلا لیدونکي لیدلوري د ټولنې په نورو موضوعاتو کې فعالې او ښه فکر لري، د ښاري نظافت د ښه مدیریت په موخه په کورنیو کې په پخلنځي او چاپېریال کې د کثافاتو په بېلولو کې هم مهمه ونډه لري او له موږ سره د کثافاتو په ټولولو او انتقال کې مرسته کولی شي، ترڅو کابل ښار د نظافت او پاکۍ د یوه غوره فرهنګ خاوند شي. په پای کې له دغه بنسټ څخه د ملاتړ پروژې په دې غونډه کې د پوهاوي او معلوماتي کڅوړې چې د وچو او لامدو کثافاتو په مدیریت او بېلښت کې د ښځو د معلوماتو او تجربو د شریکولو په موخه چمتو شوې وې او همدارنګه د کورنیو د پوهاوي لپاره سینمايي نمایش وړاندې کړ.
