د پنځلسمې ناحیې د عربانو ښارګوټي په سیمه کې د فاتحي د یوه سالون کار چې د ټولنیزو اسانتیاوو د رامنځته کولو لپاره زموږ د یوه ښاري عبدالوکیل بقايي د ورثې په مالي مرسته جوړ شوی دی، د ۱۳۹۸کال د لړم په ۲۳مه د جمعې په ورځ په یو لړ مراسمو کې د کابل ښاروالۍ د ټولنیزو او کلتوري خدمتونو معین مرستیال سرڅېړونکي محمد فاضل شریفي ته تسلیم او ګټې اخیستنې ته وسپارل شو. په دغو مراسمو کې د کابل ښاروالۍ د ټولنیزو او کلتوري خدمتونو مرستیال له آغلې فوزیه علم بقايي، چې د عبدالوکیل بقايي له وارثانو څخه ده او د دغه مذهبي ځای په جوړولو کې يې زیاتې هڅې کړې دي، د مننې تر څنګ وویل چې کابل ښاروالي به د دغه ځای د زرغونې ساحې د اوبولو او ساتلو لپاره پروګرامونه عملي کړي، ترڅو ځايی او د اړوندو ساحو اوسېدونکو لپاره زیاتې اسانتیاوې چمتو شي. دغه سالون په ۳۰۰ متره مربع مساحت په یوه منزل کې په پاخه او اساسي ډول جوړ شوی، چې عصري، تشنابونه، د ساتونکي کوټه، چای خونه، دهلېز او د اوبو یوه څاه پکې شامله ده او په یوه وخت کې ۵۰۰ کسان ځایولی شي.
