د کابل ښاروالۍ د زرغونتیا ریاست د ښار د ښکلا، زرغونتیا او د نیالگیو اېښودو موسم ته د چمتووالي په موخه په پغمان کې کابو د ۱۰۰ زره نیالګيو او ګلبوټو د روزنې کار پيل کړی دی. په دغو نیالګیو کې بېلابېل نیالګي لکه سروه، لمنځه، ناجو، مورپان، چنار، شینګ، دیواربید او ډول ډول ګلان شامل دي، چې په معیاری او عصري توګه په شنو خونو کې تولیدېږي. د پسرلي موسم په رارسیدو به دغه نیالګي او ګلان د کابل په ټولو ناحیو کې د سمسورتیا او ښکلا په موخه په ګلدانونو، پارکونو، غونډیو او شنو ساحو کې وکرل شي.
