دغه ناسته د کابل ښاروال احمد ذکي سرفراز لخوا جوړه شوې وه چې پکې د چاپېریال ساتنې ملي ادارې مرستیال انجینیر عزت الله صدیقي د کابل ښاروالۍ ښاري خدمتونو او چاپېریال ساتنې مرستیال ډاکټر مهتاب عالمي او اړونده چارواکو هم ګډون کړی وو، په دې بحث وکړ چې څنګه کولای شو د غیر معیاري توکو له سوند او هغه توکي چې هوا ککړوي ، مخنیوی وکړو او قانون پلي کړو . د غونډې په دوام کې کابل ښاروال د ښار په بېلابېلو برخو کې د هوا ککړتیا د مخنیوي په موخه د ګډ عملیاتي پلانونو عملي کولو او ستراتېژیو په اړه خبرې وکړې او زیاته یې کړه! د ډبرینو سکرو څخه په ګټې اخیستنې او د ښاریانو لخوا د هوا ککړتیا سبب شوي توکو څخه په استفادې د کابل ښار هوا ککړه او متاثره کړې ده نو ضرور دي چې د هوا د ککړتیا د مخنیوي لپاره بیړني پلانونه ونیسو تر څو د چاپېریال له خطرونو وژغورل شو. کابل ښاروال یادونه وکړه چې د سرغړوونکو لکه د ښارګوټو مالکان ، سوداګریز هستوګنځایونه د تودوخې لپاره له هغه موادو چې د هوا ککړتیا سبب ګرځي یا ډېر ډبرین سکاره کاروي او لږتر لږه د هوا فلټر یې نه دی نصب کړی او د ښارهوا لپاره مسؤلیت نه احساسوي ، له هغوی سره قانوني چلند وکړئ.او په ساحه کې سمدستي اقدام وکړئ. وروسته د چاپېریال ساتنې ملي ادارې مرستیال د هوا ککړتیا او د هوا سیستم له کیفیت څخه نظارت په اړه خبرې وکړې . هغه د هوا ککړتیا اسباب د ډېرو غیر فلټر شوي سکرو سوزول یاد کړل چې ښارګوټي او هستوګنې بلاکونه ترې ګټه اخلي . نوموړي د کابل ښاروالۍ سره خپله همکاري څرګنده کړه او د بحثونو له تبادلې څخه وروسته په آخرکې کابل ښاروال اړونده مسؤلینو ته هدایت ورکړ تر څو په دغه پروسه کې جدي اقدام وکړي او له ښاریانو یې وغوښتل چې د ډبرینو سکرو څخه په ګټه اخیستنه کې کموالی راولي
