نن د کابل ښاروال پوهنیار احمد ذکي سرافراز په مشرۍ د حامد کرزي د نړیوال هوايي ډګر د ختیځو ساحو د پراختیا په اړه د کابل ښاروالۍ، ملي دفاع وزرات، کورنیو چارو وزارت، امنیت شورا او د ځمکو ادارې تر منځ ګډه ناسته وشوه. لومړی کابل ښاروال د هوايي ډګر د ختیځو ګدامونو د استملاک او بدیل په اړه د چمتو شوو املاکي طرحو او پلانونو په اړه ارزونه وکړه، چې ټاکل شوې د کابل د هوايي ډګر د امنیت د ټینګښت لپاره له وزیراباد کانال څخه د پنځمې کوڅې تر مخامخ د تېلو ټانګ پورې مالګدامونه، فابریکې، کانتینرپلورنځي، سرایونه او ورکشاپونه او د میدان پر لور له دسپیچري سړک څخه د هوايي ډګر تر احاطې پورې فابریکې د ولسمشرۍ ریاست او امنیت شورا د هدایت پر اساس او د ځمکو ریاست او کابل ښاروالۍ په همکارۍ د ملکیتونو خاوندانو ته د بدیلو ځایونو د توزیع کولو د استملاک کار، چې مخکې بدیله ساحه په پام کې ورته نیول شوې، پيل شي. کابل ښاروال په ۱۹مه ناحیه کې د هودخېلو بدیلې ساحې ته د سرایونو، فابریکو او مالګدامونو د انتقال په برخه کې د تفصیلي پلان مطابق د بدیلې ساحې د هوارولو او د هغې د سړک جوړولو چارې، د ګدامونو او فابریکو له مالکانو سره په تفاهم اړوندو برخو ته لارښوونه وکړه او د دخیلو ادارو تر منځ یې د همغږۍ پر اصل ټينګار وکړ.
