کابل ښاروال پوهنیار احمد ذکي سرفراز د افغانستان اسلامي جمهوري دولت د یوه لوړ پوړي پلاوي په ترکیب کې د متحده عربي اماراتو په پلازمېنه ابوظبۍ کې په لسمه نړیواله ښاري ناسته کې د نړیوالو همکاریو د جلب لپاره د کابل ښاروالۍ نوي پلانونه او پروګرامونه وړاندې کړل. کابل ښاروال د ملګرو ملتونو د سرمنشي له مرستیالې او د UN-Habitat موسسې له اجرایوي رییسې مېرمن میمونې محمد شریف سره د هبیتات پروژو په اړه هم خبرې وکړې او ویې ویل چې د دې ادارې فعالیتونه باید د کابل ښار له اړتیاوو او لومړیتوبونو سره همغږي او منسجم ترسره شي. چې په مقابل کې د ملګرو ملتونو د سرمنشي مرستیالې ژمنه وکړه چې د دې ادارې فعالیتونه به په کابل ښار کې د ښاري پراختیا د لومړیتوبونو پر اساس تنظیم شي او موږ به په دې برخه کې پر یوه طرحه کار وکړو او هغه د کابل ښاروالۍ په همغږۍ شریکوو، ترڅو د بېخبنسټي او ټولګټو پروژو د اغېزمنتیا لا ښه زمېنه برابره شي.
