اقتصادي او سوداګريزې پراختیا او فقر د کمښت په چارو کې د ولسمشر فوق العاده استازي محمد یوسف غضنفر، کابل ښاروال محمد داود سلطانزوی او د سوداګرۍ او صنعت وزارت سرپرست وزیر اجمل احمدي په يوه ناسته کې د مرستو پر وېش بحث او خبرې وکړې. په دغو خبرواترو کې د اړمنو پېژندنه او له هغو سره مرسته او د بیړني حالت زيانمنو ته د اسانتياوو پر چمتو کېدو تمرکز وشو، چې د نانواییو له لارې اړمنو او بېوزلو کورنیو ته د ډوډۍ او مرستې رسول د بحث محور و. په پای کې د نانوایانو او لومړنيو توکو د پلورونکو له رییس او استازو سره اړمنو ته د ډوډۍ د چمتو کولو او وېش په اړه خبرې وشوې، چې هغوی هم خپل ملاتړ وښود او د دولت د مرستو د وېش په برخه کې يې چمتووالى وښود.
