نن له غرمې وروسته کابل ښاروال محمد داود سلطانزوی د سکایپ کنفرانس له لارې د تهران له ښاروال ډاکټر پیروز حناچي سره خبرې اترې وکړې. لومړی کابل ښاروال د فرهنګي مشترکاتو د بیان تر څنګ په تهران کې له مېشتو افغانانو سره د تهران د خلکو له همکاریو مننه وکړه او په دغه ښار کې يې له مېشتو افغانانو سره د لازياتو همکاریو غوښتنه وکړه.. کابل ښاروال له کرونا وېروس سره د مبارزې په اړه د کابل ښاروالۍ او د دغه ښار د ښاريانو د تجربو یادونه وکړه او تهران د وضعیت پر ښه کولو او همدرانګه د کابل او تهران د ښاريانو تر منځ د اړیکو پر ټینګولو ټینګار درلود چې دا چارې د اړيکو د ټينګښت، د خدمتونو د ارایې او په ټوله کې د ښارونو د وضیعت د ښه والي لامل کېږي. همدارنگه د تهران له ښاروال څخه يې غوښتنه وکړه چې د کرونا وېروس له پای ته رسېدو وروسته د کابل تاريخي ښار لیدنه وکړي ترڅو د دغو دوو ښارواليو تر منځ همکارۍ پياوړې شي او یو د بل له تجربو د ښارونو په پرمختگ او وده کې ګټه واخیستل شي. ورپسې د تهران ښاروال په مختلفو برخو کې د همکارۍ ژمنه وکړه او د تهران ښاريانو د مننې پيغامونه يې کابل ښاروال او ښاريانو ته وړاندې کړل.