کابل ښاروالۍ ښاریانو ته د اسانتياوو چمتو کولو او ښاري معيارونو ته د رسېدو په موخه د ملګرو ملتونو د هبیتات دفتر په همکارۍ د پتې موندنې پروګرام په ځانګړو روشونو په دوو بېلو پړاونو کې له څه مهال راهيسې پیل کړې، چې په دې وروستیو کې د لومړۍ، دویمې، درېيمې، څلورمې، شپږمې، یولسمې، شپاړسمې او اولسمې ناحيې د استوګنې کورونو د لوحو د نصبولو کار بشپړ شو. د دغه پروګرام لومړی پړاو چې د ناحيو موقعیت ته په پام د کورونو، کوڅو او سړکونو سروې، ثبت او شمارهاېښودل پکې شامل وو، بشپړ شو؛ چې په هر ګذر کې له ۱ تر ۱۲۵۰ شمارې پر کورونو شماره وهل شوې ده، د کوڅې یوه خوا تاق او بله یې جفت عددونه دي او د کورونو په ردیف کې درې بسوې خالي ساحو ته ریزرفي شماره په پام کې نیول شوې ده. په همدې توګه ټاکل شوې چې ژر تر ژره د کوڅو، سړکونو او څلورلارو لوحې هم ترتیب او نصب کړل شي. په راتلونکي کې د پتې موندنې پروګرام په پرمختګ هغه ښاريان چې ګوګل نقشې، انټرنیټ او ځيرکو موبایلونو یا جي پي اس نقليه وسایطو ته لاسرسی لري، د اړتیا وړ پته د کور شمېرې، د کوڅې نامه یا شمارې او د ناحیې له شمارې څخه په ګټه اخیستنه په اسانۍ موندلی شي. څوک چې ټيکنالوژۍ ته لاسرسی نه لري، د پورتنيو معلوماتو (د کور، لمبر، د کوڅې نامه یا شمارې او ناحیې لمبر) په درلودو سره د اړوندو ناحيو له نقشې او څوک چې له نقشې کارولو سره بلد نه وي، د ځايي خلکو په کمه مرسته د پام وړ پته موندلی شي. د يادونې وړ ده چې د پتې موندنې پروګرام دوام لري او په دغو ناحيو کې ټولټال ۱۶۷۸۴۳ نمبر پلیټونه نصب شوي دي.
