کابل ښاروال محمد داود سطانزوی نن چهارشبنه د چنګاښ په ۱۱مه د کابل ترافیکو په مدیریت کې د جواز سیر او موټرچلونې جواز د صدور مرکز، چې کابل ښاروالۍ جوړ کړی، لیدنه وکړه.
نوموړي په دې لیدنه کې له دغه مرکزه د ګټې اخیستنې او د دغو دوو اسنادو د ساده کولو د پروسو په اړه ټينګار وکړ.
کابل ښاروال وویل چې له دغه مرکزه په ګټه اخیستنه او د پېچلو پروسو په ساده کولو ښاریانو او د ترافیکو مدیریت مراجعینو ته غوره اسانتیاوې چمتو کېږي او د نظم ټينګښت او د ښار په ترافیکو کې د قانون منلو پر لور ګام پورته کېږي.
کابل ښاروال زیاته کړه چې کابل ښاروالۍ پتېیله ده، څو د کابل ښار ترافیکو ته د نظم ورکولو په موخه لا زیات تاسیسات او بېخبنسټونه جوړ کړي، څو د ښار د ترافیکو پر نظم، چې زموږ د خلکو او نظام د فرهنګ ښودونکی دی، لا زیات کار وشي.
کابل ښاروال د اړوندو برخو مسوولانو ته لارښوونه وکړه څو ژر تر ژره په دغه مرکز کې تجهیزات او امکانات چمتو کړي.
د دغه مرکز د جوړولو موخه ترافیکي خدمتونه لکه په نړیوالو معیارونو او له سیمې سره یو شان د ډیجیټلي جواز سیر او موټرچلونې جواز وړاندې کول دي.
دغه مرکز چې تر ۱۸ میلیونه زیاته بودیجه یې د کابل ښاروالۍ له داخلي بودیجې اجرا شوې، په نږدې وخت فعالیت پيلوي.
په دغه مرکز کې ټول ترافیکي خدمتونه لکه بانک، د جواز سیر او موټرچلونې جواز صدور، بایومتریک او د بیمې خدمتونه وړاندې کېږي.
همدارنګه د دغه مرکز د جوړولو موخه د ترافیکي خدمتونو په ښهوالي او چټکتیا او د جواز سیر او موټرچلونې جواز صدور کې د جعل مخنیوی دی.
