امیر بخارا بڼ به د خپل تاریخي هویت په ساتنې سره په اساسي ډول بیا ورغول شي

امیر بخارا بڼ د امیر عبدالرحمان خان په دوران کې جوړ شو او د امیر بخارا چې په ‎افغانستان کې یې پنا اخیستې وه، په واک کې ورکړل شو. دغه بڼ کلونه د عالم‌خان امیر بخارا او د هغه د کورنۍ هستوګنځی و. دا بڼ چې په قلعه فتوح کې موقعیت لري، مساحت یې تر ۳۰ جریبه زیات دی. کابل ښاروالي د ولسمشرۍ ریاست د چارو ادارې د عملیاتي واحد او اطلاعاتو او کلتور وزارت په همکارۍ په پام کې لري، ترڅو دغه تاریخي بڼ په اساسي ډول ورغوي او د خپل تاریخي هویت په ساتلو یې د کابل ښاریانو لیدنې ته چمتو  کړي.  دغه بڼ د کابل ښار د تاریخي او فرهنګي هویت یوه برخه ده او کابل ښاروالي د کابل ښار پرمختیا او د هغه اصیلو ارزښتونو او هویت ساتلو ته ژمنه ده. دغه بنسټ د ۲۰۲۴ کال د هرکلي لپاره، چې زموږ ښار د اسلامۍ نړۍ د فرهنګي پلازمېنې په توګه معرفی شوی، تلپاتې فرهنګي فعالیتونو ته لومړیتوب ورکوي.