د پولي تخنیک پوهنتون رییس انجینر عبدالرشید اقبال او ځینو مسوولانو له کابل ښاروال سره ولیدل. په دې لیدنه کې د پولي تخنیک پوهنتون او کابل ښاروالۍ تر منځ پر دوو اړخیزو همکاریو بحث وشو. د پولي تخنیک پوهنتون رییس وویل چې دغه بنسټ حاضر دی چې په مختلفو برخو کې له کابل ښاروالۍ سره همکاري وکړي. ښاغلي سلطانزوی هم زیاته کړه چې علمي مرکزونه باید له کابل ښاروالۍ سره وتړل شي او د ښاري وضعیت د ښهوالي لپاره دوه اړخیزه همکاري ترسره شي. کابل ښاروال وویل چې د پولي تخنیک پوهنتون محصلین کولی شي چې په هر سمستر کې د خپل ستاژ کارونه د کابل ښاروالۍ له پروګرامونو څخه په ګټه اخیستنه ترسره کړي. دواړو اړخونو د پولي تخنیک پوهنتون او کابل ښاروالۍ تر منځ د همکارۍ د یوه هوکړهلیک پر لاسلیکولو هم بحث وکړ.
