د افغانستان د اسلامي بانک رییس سید کریم الله الفلاحي له کابل ښاروال محمد داود سلطانزوی سره ولیدل. په دې لیدنه کې کابل ښاروال د افغانستان اسلامي بانک ته بلنه ورکړه چې د ښاروالۍ د پرمختيايي پروګرامونو په برخو کې ونډه واخلي او که لېوالتیا ولري، د کابل ښاروالۍ په مختلفو برخو کې پانګونه کولی شي. کابل ښاروال چمتووالی وښود چې له هر اړخیزو خبرو اترو او د دغه بانک د پروګرامونو په اړه له معلوماتو اخيستو وروسته به د دغو دوو بنسټونو د عملي پروګرامونو او همکاريو په اړه تصمیم ونيسي. د افغانستان د اسلامي بانک رییس هم لېوالتیا وښوده چې له هر اړخیزو خبرو او د افغانستان اسلامي بانک او کابل ښاروالۍ تر منځ له همغږۍ رامنځته کېدو وروسته به د کابل ښاروالۍ د پرمختيايي پروګرامونو په برخو کې پر عملي پروګرامونو او د پانګونې پر پلان کار وکړي.
