د افغانستان د ولسمشرۍ ریاست عالي مقام د احکامو مطابق نظيف الله قلندرزی په مافوق رتبه بست کې د کابل ښاروالۍ د مالي او اداري مرستیال، محمد آصف جلالزى په لومړي بست کې د پلان، پالیسۍ، څارنې او ارزونې رییس، الهام کبیر په دویم بست کې د سوداګرۍ او ښاري صنعت چارو ریاست د مرستیال، زهرا جویا په دویم بست کې د نشراتو او عامه پوهاوي ریاست د نشراتي مرستیالې، محمد نور سرحدي په دویم بست کې د سمسورتیا ریاست د اداري مرستیال، عبيدالله شفق په دویم بست کې د مالي او اداري چارو ریاست د حسابي مرستیال او اکرم خان ځدران په دويم بست کې د نولسمې ناحیې د رییس په توګه وګومال شول او نن د روان کال چنګاښ مياشتې په ۲۶مه په یو لړ مراسمو کې کابل ښاروال محمد داود سلطانزوی او د دغه بنسټ مرستیالانو خپلو همکارانو ته وروپېژندل. په دغه مراسمو کې کابل ښاروال په اوسنیو شرایطو کې د نوو مسوولانو ټاکل د کابل ښاروالۍ د عوایدو په لوړولو، د مالي او اداري چارو سیستم جوړولو او د اغېزمنو او کارنده خدمتونو په وړاندې کولو دقیقه ټاکنه او یوه اړتیا وګڼله او ویې ویل: د تخصص پالنې اصل په موخه موږ په خپل بنسټ کې هر اړخیزو او بنسټي اصلاحاتو ته ژمن یو، ترڅو ښاري اړتياوو ته د ځواب ویونکو خدمتونو له لارې د خلکو د رضايت کچه لوړه شي. کابل ښاروال یادونه وکړه چې د کابل ښاروالۍ عوايد د دغه بنسټ د عوایدو سرچینه ده او د اغېزمنو کارونو په ترسره کولو به د کابل ښاروالۍ په مختلفو مدیریتي سطحو کې ځوابوینه او روڼتيا رامنځته کړو. د يادونې وړ ده چې نوي ګومارل شوي مسوولان د ليسانس او ماسټرۍ په کچه لوړې زده کړې او د پام وړ کاري تجربه لري.
