د کابل ښاروالۍ خدماتي کارکوونکو د اختر په ورځو کې له څلور زرو ټنو زیاتې خځلې او چټلۍ له کابل ښار نه ټولې او ځانګړو ځایونو ته لیږدولې دي . د لوی اختر په ورځو کې له مخکې پلان سره سم د کابل ښار پاکوالي ته ځانګړې پاملرنه شوې او خځلې په ځانګړې توګه د څارویو قربانۍ څخه رامنځته شوې چټلۍ د نورو کلونو په پرته سږ کال په ګټوره توګه ټولې او ځانګړو ځایونو ته لیږدول شوې دي. د یادې ادارې خدماتي کارکوونکو د لوی اختر په دریو ورځو ، په دوه کاري وختونو کې د خځلو او چټلیو ټولو لپاره لاس په کار شوي دي او ۴۶۸۱ ټنه خځلې یې د کابل ښار له ۲۲ ناحیو څخه راټولې کړې دي ، چې ۲۱۸۱ ټنه یې له ښار څخه بیرون او ۲۵۰۰ ټنه نورې یې د تنظیف ریاست د ننه ځانګړي ځای ته لیږدول شوې دي. کابل ښاروالۍ له هغو ښاریانو څخه چې د خځلو او چټلیو په ټولولو کې یې مرسته کړې د زړه له تله مننه کوي او په نورو برخو کې یې د همکاریو هیله لري.
