د بامیان ولایت کابل مېشتو اوسېدونکو له مافیا سره د مبارزې او هڅو په ځانګړې توګه د سرغړونو د کمښت، د نظم او ښاري اصولو او مقرراتو د ټينګښت په برخه کې له کابل ښاروال محمد داود سلطانزوی څخه خپل ملاتړ اعلان کړ. دغو ښاریانو وویل چې کابل ښار په ټولو افغانانو پورې تړلی او د جوړوونکو پروګرامونو د اجرا، پر ټولو د قانون د یو شان پلي کېدو او د نورو عمراني پروګرامونو او د هېواد د اصیل فرهنګ د بېرته راژوندي کېدو لپاره باید یو بل ته لاس ورکړو. دوی زیاته کړه چې د کابل ښاروال د هڅو له امله د کابل ښار پاکي او زرغونتیا ښه شوې او د اجرا او پلان په پړاونو کې د ابادۍ پروژې د نني عصر د اړتیاوو پر اساس پر مخ ځي، چې اړینه ده د جوړوونکو پلانونو او پروګرامونو په اجرا کې د کابل ښاروالۍ ملاتړ وکړو. دوی په کابل ښار کې د یو بل منلو او د قانون په پام کې نیولو په اړه ټينګار وکړ. دغو ښاریانو د کابل ښار اساسي ستونزې بېرقمه وده، سرغړونه او قانون ماتونه او په ښاري مسایلو کې د ښاریانو ونډه نه اخیستل په ګوته کړل. کابل ښاروال په خپلو خبرو کې وویل چې د ټولنیز عدالت د ټینګښت، د کابل ښار د اقتصادي ودې او لرلید د سترو پلانونو د اجرا کولو او ښاري فرهنګ د راژوندي کولو لپاره جدي هوډ لري. دغهراز په کابل ښار کې یې د ښاري اصولو او قوانینو منل ډېر مهم وګڼل او زیاته یې کړه چې کابل ښار باید له قومي تړاوه راووځي او باید د ښاري او یو موټی کېدو پر لور وخوځېږو. کابل ښاروال وویل چې له معقولو او جوړوونکو انتقادونو څخه په خپلو پلانونو کې ګټه اخلو او د ښاروندانو همکاري او قدرداني موږ ته د ښار د ابادۍ او نظم په برخه کې د ډېر او کار او هڅو لپاره انرژي راکوي. ښاغلي سلطانزوی وویل چې د الله متعال په مرسته او د خلکو په ملاتړ به په دوه ویشتونو ناحیو کې ګڼ شمېر نوي پروګرامونه اجرا شي. په دغه پروګرام کې د هڅونې په توګه د بامیان بت نقاشي شوې تابلو چې دغو ښاریانو چمتو کړې وه، د دوی مشرانو کابل ښاروال ته ورکړه.
