د دغه مسیر د دویمې برخې د خنډونو د لرې کولو کار له بینی حصار څخه تر کابل –جنوب سړک پورې، چې درې کیلومتره اوږد دی، د کابل ښاروال محمد داود سلطانزوی، د ملکیتونو د مالکانو او ناحیې د مشرانو په حضور پيل شو. له پرلپسې خبرواترو وروسته کابل ښاروالۍ او د کابل-جنوب سړک د مسیر اوسېدونکي د دغه سړک تر استملاک لاندې ملکیتونو په اړه هوکړې ته ورسېدل. کابل ښاروال د ځايي اوسېدونکو له همکارۍ څخه د مننې تر څنګ ژمنه وکړه چې کابل-جنوب سړک به په معیاري او اساسي توګه جوړ شي. کابل ښاروال تر چهار آسیاب پورې د پډولې پروژې د نښلوونکي او په قول حشمت خان ساحه کې د ملي پارک له جوړولو څخه هم خبر ورکړ. کابل ښاروال د دې سترې پروژې پر وړاندې د خنډونو د لرې کولو لپاره د اړوندو ادارو همغږي اړینه وګڼله او اړوندو برخو ته یې لارښوونه وکړه چې د دغه سړک د اسنادو پړاونو د بشپړولو او اساسي ساختمان د کار لپاره اړین چمتووالي په پام کې ونیسي، ترڅو د دې مهمې پروژې کار نور ونه ځنډېږي.
