کابل ښاروال محمد داود سلطانزوی له یو شمیر هغو اړمنو ماشومانو سره ولیدل چې د (ولولئ څو افغانستان رهبري کړی READ To LEAd) مؤسسې له لوري یې ملاتړ کیږي. د یادې مؤسسې د عامه سرچینو مسئول محمد ضمیر د اړمنو ماشومانو ستونزو ته د رسیدنې په اړه د خپلو ترسره کړو کړنو په اړه کابل ښاروال ته معلومات ورکړل او زیاته یې کړه،چې یو شمیر هغو ته یې د زده کړو او روزنې زمینه برابره کړې ده او له نیکمرغه یاد ماشومان له مسلکي او حرفوي زده کړو برخمن دي چې غوښتل یې خپلو هغو هیلو ته د رسیدلو په موخه چې د کابل ښار د ابادۍ او ښکلا په اړه یې لري له کابل ښاروال سره لیدنه وکړي.کابل ښاروال د یادو ماشومانو د هڅولو او تشویق لپاره وویل چې د نن نسل د سبا هیلې او جوړونکي دي او ژمنه یې وکړه چې د دوی په ښوونه او روزنه کې به هر ډول مرستو ته چمتو دی. یادو ماشومانو د هیواد خپلواکۍ بیرته اخیستو ورځې د مبارکۍ تر څنګ د غازي امان خان له انځورنو په خپلو لاسونو نقاشي شوې تابلوګانې کابل ښاروال ته ډالۍ کړې.
