د پنجشنبه ورځ د روان کال د زمري په ۳۰مه کابل ښاروال محمد داود سلطانزوی په لومړۍ ناحیه کې د تیمورشاهي ساحې د بازار لیدنه وکړه. کابل ښاروال دغې ساحې ته د پښتني بانک مخامخ کتابپلورونکو د انتقال، د تيپيک غرفو د جوړولو او له خنډونو او ګرځنده پلورونکو څخه د تیمورشاهي ساحې د پاکولو لپاره -چې بېنظمي یې جوړه کړې- اړوندو مسوولانو ته لارښوونه وکړه. د کابل ښاروالۍ د ښاري ښکلي کولو طرحې ته په پام ټاکل شوې چې د پښتني بانک مخامخ کتابپلورونکي تیمورشاهي ساحې ته ولېږدول شي، چې له یوې خوا ښاري نظم ټينګېږي او له بلې خوا د کتاب لوستلو فرهنګ په وده او کتاب ته له درناوي سره مرسته کوي. د دې طرحې پر اساس دغه ساحه د فرهنګي میراثونو په ساتنې سره پر یوه فرهنګي محل بدلېږي او ښکلې او بیارغول کېږي.
