د ترانسپورتي شرکتونو د جوړولو او فعالیت د مقررې پر اساس چې د افغانستان د اسلامي جمهوریت کابینې تصویب کړې ده، د یکشنبه د وږي په دویمه د کابل ښاروالۍ او ترانسپورت وزارت تر منځ یوه ګډه ناسته وشوه. کابل ښاروال محمد داود سلطانزوی په دې ناسته کې عامه ښاري ترانسپورت ته د ښاریانو د لاسرسي په اړه خبرې وکړې. کابل ښاروال په کابل ښار کې د دغو دوو ادارو تر منځ د ترانسپورتي خدمتونو د وړاندې کولو او ګډو ترشانسپورتي پروګرامونو پر عملي کولو ټینګار وکړ. کابل ښاروال وویل چې حقوقي موضوعاتو ته په پام د دواړو ادارو حقوقي او تخنیکي ټيم د ترانسپورتي شرکتونو د جوړولو او فعالیت مقرره نهايي کوي او د دواړو ادارو د مشرتابه له تایید وروسته به د تصویب لپاره کابینې ته وړاندې کړل شي. همدارنګه د ترانسپورت وزارت تخنیکي او د پالیسۍ مرستیال حسن مبارک عزیزی د خدمتونو وړاندې کولو او اسانتیاوو رامنځته کولو لپاره د دخیلو ادارو تر منځ همغږي مهمه وګڼله او ویې ویل: د ترانسپورت وزارت مشرتابه په هېواد کې ترانسپورتي ستونزو ته په پام نوي پلانونه او پروګرامونه لري. هغه زیاته کړه چې د ترانسپورتي شرکتونو د جوړولو او فعالیت مقرره د هغه پروګرام یوه برخه ده چې دغه وزارت ته لومړیتوب لري او د دغه وزارت تخنیکي او حقوقي ټیم له دخیلو ادارو سره په همغږۍ پر دغه موضوع عملي کار پيل کړی دی. په پای کې کابل ښاروال د همغږۍ پر اصل ټينګار وکړ، چې د عامه ښاري ترانسپورت د رامنځته کېدو په برخه کې د دغو دوو ادارو غوره راتلونکی تامینوي.
