د مکرویانو د ساتنې عالي شورای غونډه د کابل ښاروال ښاغلي محمد داود سلطانزوی تر مشرۍ لاندې د تصدی شورا د غړو او عامل هیئات په ګډون په کابل ښاروالۍ کې ترسره شوه.د یادې شورا غړو او د غونډې ګډونوالو د مکرویانو سیمې اوسیدونکو په ژوند کې د ښه تغیر او اسانتیاوو برابرولو باندې تاکید وکړ او له مسئولینو سره یې بحث او خبرې اترې وکړې . کابل ښاروال د تصدیو تشکیل د ۱۳۹۹ مالي کال پلان اړوند د قراردادونو د څیړلو، د بي بي مهرو بلاکونو د کانالیزاسیون، د سپینو سیمو کې د دویم منزل دوکانونو جوړلو، د آپارتمانونو لپاره د کرایې تثبیت پر لایحو، د ۵۰۰۰۰ لیترو اړتیا وړ تیلو پر قرارداد، د مکرویانو کورونو د تصفیې پر سیستم ، د خدمتونو وړاندې کولو لایحې پر تثبیت او تغیر، پولي صلاحیتونو پر تفویض ، د ۱۳۹۸ کال پر اضافي مصرفونو او قرضونو په اړه وویل چې، په دې برخه کې د مسئولینو او اوسیدونکو مسئولیت پیژندل او درک مهم او اړین دي. کابل ښاروال له یادو ستونزو څخه د وتلو په موخه مسئولینو ته اړینې لارښوونې وکړې او له دوی یې وغوښتل چې د مکرویانو د اوسیدونکو په ژوند کې مثبت او پر ځای بدلون راولي.
